စိတ်ထဲရှိတာလေးတွေ

မနက်စောစောလေး အချိန်ရတုန်းမို့ ပို့စ်လေးတစ်ပုဒ်လောက်တော့ တင်မယ်ပေါ့။ ဘလော့ဂ်တွေလည်း အချိန်ရသလောက်လေး လည်မယ်လို့စိတ်ကူးထားတာ ဒါပေမယ့် အနတ္တသဘောလေး ပါလာပြန်တယ်။ ကွန်ပျူတာလည်း ဖွင့်ရော မီးလည်းပျက်ရော။ ဒါနဲ့ ကွန်ပျူတာကို ပြန်ပိတ် အောက်ထပ်ကိုဆင်းလာပြီး ဒီကနေ့လုပ်ရမယ့် အလုပ်တွေကို နံပါတ်အစဉ်လိုက် တန်းစီိလိုက်တယ်။

မီးမလာလည်း အလုပ်ဖြစ်မဲ့ လုပ်လို့ရတဲ့အလုပ်ကို ဦးစားပေးလုပ်ဖို့ စီစဉ်လိုက်တယ်။ ပထမဦးစွာ ခေါင်းလျှော်တဲ့အလုပ် ကိုစလုပ်တယ်။ စင်္ကာပူမှာ ခေါင်းလေးတစ်ခါလျှော်ဖို့ အရေး ဈေးနှုန်းဖတ်မိပါတယ် မျက်လုံးပြူးသွားအောင်ပါပဲ။ ၄၈ဒေါ်လာတဲ့ ဆေးတွေကတော့ ဆေးကောင်းတွေသုံးပါတယ်။ မြန်မာငွေနဲ့ တွက်ကြည့်လိုက်တော့ သုံးသောင်းကျော်တယ်။ နှမြောတာနဲ့ အိမ်မှာပဲ ကိုယ့်လက်ကိုယ်အားကိုးပြီး လျှော်ခဲ့ရတဲ့ရက်တွေ။ အခုတော့ တစ်ခါလျှော် ကျပ် နှစ်ထောင်လေ လျှော်ပါလေ့ အကြိမ်ပေါင်းများစွာ ဆေးကောင်းပဲသုံးတာပါပဲ။ အသက်အရွယ်ကလည်း ရလာပြီဆိုတော့ ဆံပင်ကိုဆေးပါဆိုးလိုက်တယ်။ စင်္ကာပူမှာဆေးပါဆိုးရင် တစ်ရာတော့ကျော်မှာ သေချာသလောက်ပဲလေ။ ဒီမှာကတော့ ဆေးဆိုး ၊ခေါင်းလျှော်က အားလုံးပေါင်းမှ ကျပ် ရှစ်ထောင်ပဲ။ ဆံပင်ဆိုးထားပြီး နာရီဝက်စောင့်ရမယ့်အချိန်မှာ အွန်လိုင်းတက်လို့မရတော့ ရှိတဲ့စာအုပ်တွေ လိုက်ဖတ်တယ်။ တစ်လလောက် လွတ်သွားတဲ့ မဂ္ဂဇင်း စာစောင်တွေဖတ်တယ်။ နာရီဝက်လောက်ကြာသွားတော့ ခေါင်းသွားပြန်လျှော်တယ်။

မနေ့က လေယာဉ်နဲ့ပြန်လာတော့ မြန်မာပြည် မရောက်ခင် တစ်နာရီလောက်မှာ ရာသီဥတုက အတော်လေးဆိုးတယ် မကြာခနဆိုသလို လေယာဉ်က တော်တော်လေးခါပြီး မသိမသာ ပြုတ်ပြုတ် ကျတာကိုခံစားရတော့ အနတ္တသဘောကို သွားသတိရလိုက်တယ်။ အိမ်ကလာကြိုတဲ့ကားတောင် စီးရပါ့မလားပေါ့။ အရာရာဟာ ကိုယ်ထင်သလိုဖြစ်ချင်မှ ဖြစ်တာ မထင်မှတ်တာတွေက ဖြစ်ဖြစ်လာတတ် တာကိုး။ ကိုယ့်ကိုယ်ကို ယုံကြည်မှုရှိနေအုံးတော့ ဒါမျိုးက ပြောလို့တော့မရဘူးလေ။ လူတွေရဲ့ သေမည့်နေ့ သေမည့်နေရာ သေမည့်အချိန် မည်သို့သေရမည်ဆိုတာကို ဘယ်သူမှမပြောနိုင်ဘူးလေ။ ဒီလိုမျိုး အတွေ့ အကြုံတွေကလည်း ကြားဘူးနားဝကရှိသလို အသက်အရွယ် အပိုင်းအခြားအရ မြင်တွေ့နေရတာတွေ ကလည်း များပြီမဟုတ်လား။ ဒါကြောင့်လည်း ဆရာတော်တစ်ပါး ပြောသလို မိုးလင်းတာနဲ့ ကိုယ့်ကိုယ်ကို သရဏဂုံတင်ပါ။ အိပ်ခါနီးမှာ သရဏဂုံတင်ပါ။ ဆိုတာကို အမြဲနှလုံးသွင်းမိတယ်။ မိတ်ဆွေများလည်း ကြုံဖူးကြမှာပါ နေ့မြင်ညပျောက်ဆိုတာကိုပေါ့။ အကောင်းချည်းကနေ ဘဝခြားသွားသူတွေ ဒုနဲ့ဒေး။ ကိုယ့်ကိုယ်ကို မရတော့ဘူးရယ်လို့ စိတ်လျော့လိုက်ပြီးခါမှ ဝိဉာဏ်တစ်ပတ်လည်ပြီး ပြန်ကောင်းလာတာမျိုး။ ဒါတွေအားလုံးဟာ တကယ်တော့ ပိုင်ပိုင်နိုင်နိုင် ဘာမှကျိန်းသေ တွက်လို့မရတဲ့ အကြောင်းအရာတွေပါ။ 

နောက်တစ်ချက် ကျမရဲ့ထင်မြင်ယူဆချက်ပေါ့။ အကြောင်းကြောင့်အကျိုးဖြစ်မှာ ကောင်းတာလုပ်ရင် ကောင်းတာဖြစ်မယ် မကောင်းတာလုပ်ရင် မကောင်းတာဖြစ်မယ်။ ဒါတွေကို လူတိုင်းသဘောပေါက် လက်ခံ ကြပါတယ်။ ဒါပေမယ့် ဆုတောင်းလို့ပြည့်တာ မဟုတ်ပဲ ကောင်းတာလုပ်ခဲ့တဲ့အပေါ်မှာ ကောင်းတာဖြစ်သွား တာလို့ ကျမထင်တယ်။ တနည်းဆိုရရင်တော့ ငါးပါးသီလနဲ့ ကံသုံးပါးကို လုံခြုံနေတဲ့သူတစ်ယောက်အဖို့ ကောင်းကျိုးသာ ဖြစ်မှာပါပဲ ဆိုးကျိုးဖြစ်လာနိုင်စရာမရှိဘူးလေ။ ဒီတော့ သူတောင်းတဲ့ဆုတွေက အလိုလိုနေရင်း ပြည့်လာတတ်တဲ့သဘောပေါ့။

အစကတော့ တာချီလိတ်ကနေ တာလေရွာကြီးကို ပြောင်းရွှေ့တဲ့ ပို့စ်လေးတင်မလို့ကနေ မီးပျက်သွားတာနဲ့ အနတ္တသဘောလေးဆောင်ပြီး စိတ်ထဲရှိတာလေးတွေ ပို့စ်ဖြစ်သွားပါတယ်ကွယ်။

မေတ္တာဖြင့်
အန်တီတင့်