23.5.16

အပယ်ပိတ်ဘုရားဖူး (၁၂)ရက်ခရီးစဉ်-၇ရက်မြောက်


၁၇-၄-၂၀၁၆ တနင်္ဂနွေ နှစ်ဆန်း(၁)ရက်နေ့တွင် ကျမတို့ဘုရားဖူးအဖွဲ့၏ ခရီးစဉ် ၇-ရက်မြောက်နေ့ပင် ဖြစ်ပါသည်။ မြန်မာရွှေကျောင်းတော်ကြီးတွင် နံနက်စာသုံးဆောင်ကြပြီး မြတ်စွာဘုရားအလောင်းတော် ဖွားမြင်ရာ လုမ္ဗိနီအင်ကြင်းတောရှိ မယ်တော်မာယာ အုတ်ကျောင်းနှင့် စေတီရာများ၊ အသောကကျောက်တိုင်သို့ သွားရောက်ဖူးမြှော်ကြပါသည်။  ထိုသို့သွားရာတွင် ဘုန်ကြီးကျောင်းမှ လမ်းလျှောက်သွားကြရသဖြင့် ပူလောင်သောရာသီဥတုဒဏ်ကို ခံနိုင်စေရန် ဘုရားဖူးအဖွဲ့များ ရေဗူး၊ ထီး၊ ဦးထုပ်များအစရှိသည်များကို ယူဆောင်သွားကြရန် တာဝန်ခံမှ ကြိုတင်၍ မှာကြားပါသည်။ ထို့အပြင် မယ်တော်အုတ်ကျောင်း အတွင်းတွင် ဓာတ်ပုံ ဗွီဒီယိုအစရှိသည့် မှတ်တမ်းတို့ ရိုက်ကူးခွင့်မရှိပါ။ အပြင်ဘက်တွင်သာ ရိုက်ကူးခွင့်ရှိပြီး တားမြစ်ချက်အား လိုက်နာခြင်းမရှိပါက သတ်မှတ်ဒဏ်ကြေး ပေးဆောင်ရမည်ဖြစ်ကြောင်း မယ်တော်အုတ်ကျောင်းသို့ မ၀င်မီ ဘုရားဖူးအဖွဲ့အား တာဝန်ခံမှ ကြိုတင်သတိပေးပါသည်။ သွားရာလမ်း၌ ဂက်စ်လွှတ်၍ စဉ်ဆက်မပြတ် ထွန်းညှိထားသော ငြိမ်းချမ်းရေးမီးရှူးတိုင်ကို တွေ့မြင်ရလေသည်။  
တစ်ညတာတည်းခိုခဲ့သည့် မြန်မာရွှေကျောင်းတော်ကြီး

 ငြိမ်းချမ်းရေးမီးရှူးတိုင်
ငြိမ်းချမ်းရေးမီးရှူးတိုင်နှင့်ရေမြောင်းကြီး

သိဒ္ဓတ္ထမင်းသားဖွားမြင်ရာသို့ သွားရာလမ်း


မဟာသက္ကရာဇ်-၆၈ခု၊ ကဆုန်လပြည့် သောကြာနေ့တွင် အနှိုင်းမဲ့ အနန္တကျေးဇူးတော်ရှင် မြတ်ဗုဒ္ဓအား ကပိလ၀တ်နှင့် ဒေ၀ဒတ်ကြား လုမ္ဗိနီဥယျာဉ်တွင် ဖွားမြင်တော်မူခဲ့သည်။ ဖွားမြင်ပြီးစ အလောင်းတော်အား ဗြဟ္မာကြီးလေးဦးက ရွှေဇာကွန်ရက်ဖြင့် လည်းကောင်း၊ စတုမဟာရာဇ် နတ်မင်းကြီးလေးဦးက သစ်နက်ရေဖြင့် လည်းကောင်း၊ လူတို့က ဘွဲ့ဖြူပုဆိုးဖြင့်လည်းကောင်း အဆင့်ဆင့် ခံယူကြသည်။ ထို့နောက် ဘုရားလောင်းတော်သည် မြေပေါ်၌ ခြေအစုံရပ်လျက် အရပ်ဆယ်မျက်နှာတို့ကို အစဉ်အတိုင်း ကြည့်ရှုတော်မူရာ ကိုယ်တော်မြတ်နှင့် တူသောသူ တစ်စုံတစ်ယောက်ကိုမျှ မြင်တော် မမူသဖြင့် ရပ်တော်မူရာအရပ်မှ မြောက်အရပ်သို့ မျက်နှာတူရူ ခြေခုနှစ်ဖ၀ါး ကြွလှမ်းတော်မူပြီးနောက် စကားကြီးသုံးခွန်းအား ကြုံးဝါးမြွက်ဆိုတော်မူသည်-
၁။ ငါသည် လူသုံးပါးတွင် အမြတ်ဆုံးဖြစ်၏။
၂။ ငါသည် လူသုံးပါးတွင် အကြီးအကဲဆုံးဖြစ်၏။
၃။ ငါသည် လူသုံးပါးတွင် အချီးမွမ်းခံအပ်ဆုံးဖြစ်၏။
(အခြားတစ်နည်း)
၁။ သတ္တလောကတစ်ခုလုံးတွင် ငါသည်အမြတ်ဆုံးဖြစ်သည်။
၂။ ဤ ပဋိသန္ဓေသည် နောက်ဆုံးဖြစ်သည်။
၃။ ယခု ငါ့မှာ နောက်တစ်ဖန်ဘ၀ဖြစ်ခြင်း မရှိတော့ပြီ။


မယ်တော်မာယာအုတ်တိုက်
မယ်တော်မာယာအုတ်တိုက်နှင့် အသောကကျောက်တိုင်

 သိဒ္ဓတ္ထမင်းသား ခြေ (၇)လှမ်း လှမ်းရာစေတီတော်များ

အသောကမင်းကြီးသည် နန်းစံသက် အနှစ်(၂၀)အကြာ ဘီစီ(၂၅၀)တွင် မြတ်စွာဘုရား ဖွားမြင်တော်မူသည့် နေရာကို မှတ်သား၍ အသောကကျောက်တိုင်ကို စိုက်ထူခဲ့သည်။ မူလက ပေ(၇၀)ခန့်မြင့်သော်လည်း မိုးကြိုးဒဏ်ကြောင့်သော်လည်းကောင်း၊ ရန်သူတို့ဖျက်ဆီးမှုကြောင့် သော်လည်းကောင်း ကျောက်တိုင်မှာကျိုးနေပြီး လုံးပတ်(၉)ပေ အမြင့်(၁၂)ပေခန့်သာ ရှိတော့သည်။ ထိုကျောက်တိုင်ပေါ်တွင် စာငါးကြောင်း ရေးထိုးထားပြီး စာ၏အဓိပ္ပါယ်မှာ-
“ဒေ၀ါနံ ပိယတိဿ မင်းကြီးသည် နန်းစံအနှစ်(၂၀)တွင် ဤဒေသသို့ ဘုရားဖူး ရောက်ခဲ့သည်။ မြတ်စွာဘုရား ဖွားတော်မူရာဌာန အထိမ်းအမှတ်အဖြစ် ကျောက်တိုင် စိုက်ထူခဲ့သည်။ လုမ္ဗိနီရွာကို အခွန်တော်လွတ်ငြိမ်းခွင့်ပြလိုက်သည်” ဟု ရေးထိုးထားသည်။
အသောကကျောက်တိုင်

မယ်တော်မာယာ အုတ်ကျောင်းအတွင်း ဓာတ်ပုံရိုက်ခွင့်မရှိသဖြင့် မှတ်တမ်းပုံများ မရခဲ့ပါ။ မယ်တော်မာယာ အဆောက်အအုံနှင့် မလှမ်းမကမ်းတွင်ရှိသော လေးထောင့်ရေကန်သည် ဘုရားလောင်းတော် ဖွားမြင်သောအခါ ကောင်းကင်ယံမှ ထန်းပင်လုံးခန့်ရှိရေပူနှင့်ရေအေး စမ်းနှစ်သွယ် စီးဆင်းလာပြီး မယ်တော်နှင့်သားတော်ကို ရေသပ္ပါယ်၍ သန့်ရှင်းစင်ကြယ် နွေးထွေးစေခဲ့သည်။ ဗုဒ္ဓဘာသာသုတ္တန်တွင် ‘မှန်သားပြင်ကဲ့သို့ ကြည်လင်တောက်ပသော ရေမျက်နှာပြင်တွင် ပန်းမျိုးစုံတို့ ဖုံးလွှမ်းလျှက်ရှိကြောင်း’ မှတ်တမ်းတင်ထားသည်။
ဘုရားလောင်းဖွားမြင်ရာတွင် မယ်တော်နှင့်သားတော်အားရေသပ္ပါယ်ကာ သန့်ရှင်းစယ်ကြယ်စေသည့်ရေကန်

ဗုဒ္ဓသည် ကပိလ၀တ်မှနေ၍ ဒေ၀ဒဟသို့ ကြွတော်မူစဉ် ခရီးတစ်ထောက်အဖြစ် ကြားနယ် မြေလုမ္ဗိနီသို့ ၀င်ရောက်ကာ ဒေ၀ဒဟသုတ္တန်ကို လုမ္ဗိနီတွင်ပင် ဟောမြွက်တော်မူခဲ့သည်။ လုမ္ဗိနီနှင့် ကပိလ၀တ်တို့ကို ၁၈၈၆-ခုနှစ်တွင် ပြန်လည်တွေ့ရှိချိန်အထိ နှစ်ပေါင်းထောင်နှင့်ချီ၍ တောချုံများ အောက်တွင် ပျောက်ဆုံးနေခဲ့သည်။ ဤသို့ထူးမြတ်လှသည့်နေရာတော်သို့ သိရိဓမ္မာသောကမင်းကြီး စိုက်ထူခဲ့သော ကျောက်စာတိုင်ကြီးသည် မိုးကြိုးဒဏ်ကြောင့် အက်ကြောင်းထင်လျှက်ရှိကာ ကုသိန္နာရုံ ဆရာတော်ကြီး အသျှင်စန္ဒြမုနိက သံပြားဖြင့်ပတ်ပြီး သံတိုင်များကာရံတော်မူခဲ့သည်။



မြန်မာရွှေကျောင်းတော်ကြီး အနီးတွင်ရှိသော လောကမဏိစူဠာစေတီတော်


လုမ္ဗိနီအင်ကြင်းတောမှ ပြန်လည်ထွက်ခွာလာကြပြီး နေ့လည်စာအား ဆိုနောလီမြန်မာကျောင်းတွင် ပြန်လည်၍ သုံးဆောင်ကြကာ သာဝတ္ထိသို့ ဆက်လက်၍ ထွက်ခွာကြပါသည်။ ညနေပိုင်းတွင် သာဝတ္ထိမြို့ မဟာဇေယျသုခ မြန်မာဘုန်းတော်ကြီးကျောင်းသို့ ရောက်ရှိလာကြကာ ခေတ္တခဏ အနားယူကြသည်။ ညစာအားထိုကျောင်းတွင်ပင် သုံးဆောင်ကြပြီး တစ်ရက်တာအတွက် ညအိပ်အနားယူကြပါသည်။

ကိုယ်စိတ်နှစ်ပါး ကြည်လင်အေးမြ ချမ်းသာသုခနဲ့ ပြည့်ဝကြပါစေ။

မေတ္တာဖြင့်
အန်တီတင့်

ခဏစောင့်ပါ...

 
©2012 အန်တီတင့်၏ အမှတ်တရလေးများ | Design by Mozz