သံသရာမှလွတ်လမ်း

ရပ်မနေတဲ့အသက်က တစ်ရက်ထက်တစ်ရက် ကြီးလာပြီဆိုတော့ လုပ်ချင်တာထက် လုပ်သင့်တာကို ဦးစားပေး လုပ်ရမယ်ဆိုတဲ့အသိကို စိတ်ကချိန်ခါမလပ် နှိုးဆော်လာတယ်။ အချိန်တန်လာတော့ တရားသ​ဘောအရ ဇာတိက​နေ ဇရာကပြလာပြီ၊ တို​တောင်းတဲ့အချိန်အတွင်း ဗျာတိ မရဏတို့ မဖိတ်​ခေါ်ဘဲ ဆိုက်ဆိုက်​မြိုက်မြိုက် ရောက်လာ​ပေဦးမည်။ 

တရားသ​ဘော​တွေကို လွန်ဆန်လို့မရပါလားဆိုတဲ့ အသိသံ​ဝေဂဥာဏ်ယူရမယ့်အချိန်ပါ။ ငါအစွဲကိုမကျွတ်ပါဘဲ ကြုံ​တွေ့ရသမျှ ကိစ္စကြီးငယ်တို့အ​ပေါ်လိုက်ပြီး စိတ်မသက်မသာ ခံစား​နေမယ့်အစား 'ရုပ်နာမ်ခန္ဓာရထားသူတိုင်း မဖြစ်မ​နေ နဖူး​တွေ့ဒူး​တွေ့ကြုံ​လာရမည့် တရားသ​ဘောတွေဖြစ်တာ​ကြောင့် အရာခပ်သိမ်းကုန်တို့ဟာ အနိစ္စ ဒုက္ခ အနတ္တလို့​ဆင်ခြင်​မိပါတယ်၊ စက္ကန့်မလပ်ယိုယွင်း​​နေတဲ့ရုပ်တရားကြီးကို သတိထားဆင်ခြင်တဲ့အခါ တရားရှာကိုယ်မှာ​တွေ့ဆိုတဲ့ တရားသ​ဘော​တွေကို အထင်အရှား ​တွေ့လာပါတယ်။ 

ဒီ​နေ့မနက် နှစ်ဘက်​သော​ကျေးဇူးရှင် မိဘများကို အမျှ​ဝေရင်း စက္ကန့်ပိုင်း​လောက် ကျေးဇူးရှင်ဖခင်ကြီးဆီကို စိတ်​ရောက်သွားခဲ့တယ်၊ မကွယ်လွန်မီအချိန်အခါက တရားနာဘို့ တရားအားထုတ်ဘို့ စည်းရုံးတိုင်း “ကိုယ်တိုင် စိတ်ကောင်းထားရင် ပြီးတာပါဘဲ။ မနက်အိပ်ယာနိုးတိုင်းလည်း တရားထိုင်ဖြစ်ပါတယ်” လို့ ပြန်ပြောလေ့ရှိခဲ့တယ်။ မိဘနဲ့ သားသမီး ဆိုတော့လည်း အတိုက်အခံမပြောဖြစ်ပဲ အမြဲအလျော့ပေးရစမြဲ။ တစ်ခါတစ်လေ ကျမက အကွန့်တက်ပြီး “တကယ်တော့ အချိန်နာရီပေါင်းများစွာ တရားအားထုတ်ပေမယ့် အဓိကကျတဲ့ ရုပ်တရား နာမ်တရားမှ မကွဲပြားနိုင်ရင် အချည်းအနှီးပဲ”လို့ဆိုတော့ “ဒယ်ဒီသိပါတယ်” တဲ့။ 

တရားတော်များဟာ နက်ရှိုင်းလွန်းလှပြီး ဒုက္ခကိုဒုက္ခမှန်းမသိကြဘဲ အဝိဇ္ဇာဖုံးလွှမ်းနေကြတဲ့ သဗ္ဗေသတ္တာ ဝေနေယျာအပေါင်း သံသရာမှာ စဉ်ဆက်မပြတ် ဆုံလည်နွားကဲ့သို့ တစ်ဝဲလည်လည် ဘဝဆိုးမှ လွတ်မြောက်နိုင်မည့် မဂ္ဂင်လမ်းကို မီးမောင်းထိုးပြထားခြင်းပင်။ တစ်ပါးသူကူညီလို့မရပါပဲ သစ္စာလေးပါးကို ကိုယ်တိုင် ပိုင်းခြားထင်ထင် သိမြင်စေဘို့ သစ္စာလေးပါးတရား များများနာ၊ ကိုယ်တိုင် မလျော့သော ဇွဲဝိရိယ သည်းခံစိတ်တို့နဲ့အတူ နှလုံးသွင်းမှန်ကန်စွာ ကျင့်ကြံကြိုးကုတ် ပွားများအားထုတ်နိုင်မှသာလျှင် နိဗ္ဗာန်မရောက်မီစပ်ကြား အပယ်လေးပါးမှ လွတ်မြောက်နိုင်ကြပေမည်။ 

သံသရာမှလွတ်​မြောက်ရာလမ်းကို ရှာ​ဖွေ​တွေ့ရှိနိုင်ကြပါ​စေ။ 

သာဓု သာဓု သာဓု 

🙏🙏🙏

 ​မေတ္တာဖြင့် 

တီတင့် (၂၈-၈-၂၀၂၅)